كتير مننا لو كان عرف معلومة معينة في الوقت المناسب كان ممكن حياته كلها تتغير 360 درجة. ودا بالظبط كان الحال مع السيدة س.ف
انا اسمي س.ف عندي 42 سنة ربة منزل، من سنة و9 اشهر اكتشفت إني عندي سرطان ثدي.
بالصدفة حسيت بألم في دراعي وتحت إبطي روحت كشفت وعملت أشعة ماموجرام لقيت أن عندي سرطان ثدي في الثدي اليمين. الدكتور في مستشفي الدمرداش قالي إني هاخد كيماوي الأول وبعد كدة هاعمل العملية وبالفعل خدت الكيماوي وبعد كدة عملت إستئصال كلي للثدي وبعدها خدت 25 جلسة إشعاع.
بعد الجلسة عملت أشعة سونار عشان اتابع وأطمن لكن لقيت إن السرطان جه للثدي التاني وانا دلوقتي بعيد نفس اللي مريت بيه تاني. الدكتور قالي إني هاخد كيماوي تاني وبعدها هابقي أعمل العملية.
للأسف اتخطبت في دراعي اللي ناحية العملية ودا أدي إن يجيلي تورم الذراع الليمفاديما، انا كنت خدت البديل الصناعي من المؤسسة المصرية لما عرفت عنها من واحدة قبلتها في المستشفي لما كنت بعمل العملية ولما اتخطبت وذراعي ورم روحت للمؤسسة وهما اللي ساعدوني عشان اعمل العلاج الطبيعي. وأهو الحمد لله ماشية علي العلاج الطبيعي وخدت أول جلسة كيماوي عشان الثدي التاني.
انا كمان أختي الكبيرة كان عندها سرطان ثدي وجبتها تاخد البديل من المؤسسة بردو هى جالها قبلي يعني ممكن نقول من 5 سنين وهى كانت ف المرحلة الأولي فعملت العملية والدكتور قالها أنها مش محتاجة علاج كيماوي أو إشعاعي وقالها تتابع كل سنة ولما بناتها يكبروا يبقوا يتابعوا علي نفسهم هما كمان. لكن هو مالقناش أنه وراثة وأنه ممكن يجي ليا انا أختها ومقاليش أني المفروض انا كمان اتابع واعمل أشعة ماموجرام كل سنة عشان أطمن علي نفسي ولا حتي في المستشفي اللي عملت فيها إختي العملية حد قالنا.... ياريتهم كانوا قالولي كانت فرقت أكيد معايا وكنت روحت من ساعتها اعمل الماموجرام يمكن كنت اكتشفته بدري واتفاديت كل المراحل اللي عديت بيها واللي لسه هاعدي بيها. لكن الحمد لله علي كل شئ وانا بنصح كل ست أنها تتعلم إزاي تعمل الفحص الذاتي حتى لو ماعرفتش من أول مرة لازم تحاول وتسأل عشان تعرف وأنها علي طول تعمل أشعة الماموجرام والسونار عشان تتطمن علي نفسها ولو فيه إي حاجة لقدر الله تلحقها بدري بدري.